ــــــــــــــــــــــــــــــــــ
الكتابه هم
ــــــــــــــــــــــــــــــــــ
يا قصيدي طوّل الشوق اغترابه=ما شهد قافك على همي وغمي
جيت أفرّج بعض همي بالكتابه=اكتشفت إن الكتابة كل همي
للسؤال المر في صدري إجابه=وقبل أنادي صرختي تذبل بفمي
أقدر ألبس عمة الشيخ وثيابه=وأظهر التاريخ من جيبي وكمي
للوجيه اللي ملامحها تشابه=قام فعلي وانحنى مدحي وذمي
قبل ما أوصل سرّها واكشف حجابه=كيف أميزّ وجه أخوي من ابن عمي
الكريم اللي عطا صافي شرابه=في مشاريبه دوا قلبي وسمي
يحسب إن الصيد في مروة غرابه=لا يطير ولا يهد ولا يدمي
خاب ظنه وأمطرت بأرضي سحابه=وانبتت من كل عشبه ويش آسمي
وقيظه اللي توّه ركابي سرابه=راح يمه والربيع انحاز يمي
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
ماعاد يمديني
ــــــــــــــــــــــــــــــــــ
الثلج بيدي.. او ان الثلج بسطورك=ولا هو الياس مكن سطوته فيني
هذا ارتعاشي يداهمني في حضورك=لو شفتني بعد.. مدري وش تسميني
يجبرني الهاجس ارقى الليل.. وآزورك=بثيابي اللي طوال ولاتدفيني
اكتب اغاني مطر تستنبت ازهورك=كم صافحك هاجسي.. مسحوب وهجيني
يامنادم الحزن.. حن الجو لطيورك=حتى السحابة (وَلَهْ) تبكي مثل عيني
لاتترك الشمس محبوسة ورا سورك=وتطالب الظل ينبت نور بيديني
كل المدى ظلمتك.. كل المدى نورك=اكذب اذا قلت لك غيرك يقديني
الشمس هذي غبية لا لعبت دورك=والليل هذا غبي لو جاء.. ينسيني
سنين اجهز شراع الحلم لعبورك=شفتك على دفته ضيف.. وتقهويني
متى يجيب )الشمالي( ثاير عطورك=راح العمر هقوتي ما عاد يمديني
العقل شاف الامل.. غرقان ف بحورك=والقلب عيا يصافح من يعزيني
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
صباح النور
ــــــــــــــــــــــــــــــــــ
هربت من الزمان اللي يسمونه صباح النور=وزبنتك يا الظلام وستر مجروح الزمن ثوبه
لقيتك ماسمعت احلى النصايح والعتب والشور=على زين النهار اللي لقيت اشتقت لغروبه
تجاهلت الشموس ولاالتفت لنورها المنشور=وتلقيت الطريق المظلمه دوب القدم دوبه
حسبت خطاي وعيوني مداها للعصى والسور=صحيح الشوف لكني خذيت من العمى اسلوبه
انا لي بالعمر مبدا ثبت بي والسنين تدور=ملبسني لباس المنتصر والنفس مغلوبه
يجملني بضحكه في صداها خاطرٍ مكسور= يغني في شماله والدموع تهل لجنوبه
أنا خصمي زمن واقوى سلاحي حظي المعثور=اسوق به الركاب محمله وترد مسلوبه
يعاند غيرة ٍ فيني ربت صدق وثقه وغرور=تسامت في زمانٍ يفرش الهامات لدروبه
أدوّر للوجيه المقبله وجهٍ حياه يثور=ابي منه احتجاج على الزمان المر وعيوبه
تهجيت الملامح والسطور اللي قريت سطور=طريق ودخلتني في قيود الذنب والتوبه
تصدد بي عيوني من حياها والدروب سفور=توريني وجيه في زوايا الذنب مصلوبه
تقلبها اليدين العابثه كن اليدين صخور=عليها ذكريات مؤلمه بالدمع مكتوبه
أنا وشلون ابستوطن رحابك ياصباح النور=وانا فيني وطن ينزف قبايل دين .. وعروبه
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
متعب الخطوه
ــــــــــــــــــــــــــــــــــ
يامتعب الخطوه على الدرب لاهنت=وشلون تحزن والشمال بجهاتك
جرب تمارس ضحكتك وين ماكنت=واحزان عمرك سترها في عباتك
الريح قامت وانحنت وانت ماقمت=ياحي لاتنهار قاوم وفاتك
تبي ترد الريح وتبعثر الصمت=ان مالقت بك روح شالت رفاتك
ياكبرها لاصاح داعيك وين انت ؟!=وجا ينتخيك ولالقا الا عصاتك
أدري وصلت آخر مدى الصبر وتعبت=مابه نكد في رحلة الهم فاتك
وانا بعد خاويت الايام وندمت=الله كم تشبه حياتي حياتك
هذا زمان الهم .. والفقر .. والكبت=ماهو زمن سم .. وتدلل .. وجاتك
اما انت في واقعك سلمت وآمنت=والا اعترضت وعشت في ذكرياتك
يامتعب الخطوه بوجهك تمعنت=لونك ظهر لي وادهشتني صفاتك
لو المرايا منصفه ماتلونت=كنت ابيض ٍ من مولدك لي مماتك
بعض المرايا تعكسك مثل ماانت =والا بعضها مايوريك ذاتك
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
رساله الى حواء
ــــــــــــــــــــــــــــــــــ
هذي حياة آدم ثقه .. صبر .. تشكيك=ياعيون حوا حاولي تفهمينه
من بعثرة كينونته لمسة يديك=مشغول يبني من خرابك مدينه
من داست ظلوعه ورا التوت رجليك=حتى رجعتي مثل مانتي رهينه
ماهمه الا انتي يهدك ويبنيك=قصرٍ مهيب .. ونصبك تحكمينه
خاض المعارك واستلب لك مماليك=من شان في حظرة هلك تمدحينه
سج الفيافي وانتمى للصعاليك=قاف تمنى تلبسه كل زينه
ياعيون حوا دون هذي وهذيك=آدم بحر وانتي مجرد سفينه
حلمك سرق موجه وهو يرتحل فيك=يضحك بوجه الريح وانتي حزينه
احيان يلبس حاضره ثوب ماضيك=ويعاف وجه للغلا تلبسينه
يكبر .. ويرجع طفل من شان يغريك=تدلليه بقبلة في جبينه
آدم يبيع آدم على شان يشريك=هابيل حتى اليوم تبكي يدينه
ياعيون حوا كل ماصار يفديك=بس اقبلي هالوضع لاترفضينه
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
غرسة الريحان
ــــــــــــــــــــــــــــــــــ
ياغرسة الريحان كل الغرس من حولك ذوى=وحدك بعد هاك الربيع اللي يفاخر بالخزامى والنفل
من عاطي اغصانك ولد نيسان .. والذاوي روى=لولاه مارديت اغني عقب ماقلت الغنا عيب وجهل
لولاه كان فلان مثل فلان : فلّس وانزوى=ليله كحل مزعوم ونهاره عيون ماتعرف الا تمل
عطرك نهار الليل ما غيره من الوحشه دوى=لاحل في روحي تسامت من عذابات الغرام المبتذل
استاذنه من ( وادي الفيروز ) واخرج من ( طوى ) =طفل بري من كل مايطري على بال الصدف والمحتمل
لوبيدي امحي ما كتب عمري وما الراوي روى=وابدا من اغصانك حكايه ما تليق الا بقديس وطفل
طالت مشاويري وعثراتي وكثر المحتوى =ما صرت اميز في الدروب اللي تشمت بي من اللي تحتفل
مرات ابيت في هجاد الذيب واعوي لاعوى=ومرات ابيت في قصور ماتزين الا اذا الساري ثمل
تلعب بي الصدفة والاعبها ونتمرجح سوى=ياما جرى مابين هم الفيلسوف وهم شعار الغزل
درب مشيته لاضياع ولامجون ولاغوى=طيرٍ يبي لثم السحاب ورده السافي يخب على الرمل
ماصادني صياد غلطاتي .. ذبحها واشتوى=سبحانه اللي طول الرمثه وخلاها تعذرب فـ النخل
من برقع الشاهين في شباك ملعونة ثوى=ناقص يصارع عقدته ما شاف حر الا يحاول يكتمل
ياغرسة الريحان في صمتي صريح الى نوى=خلا الوجوه الخافته من ذلة التابع تثور .. وتستقل
تعرفني الفضة وانا اعرفها لكلٍ مستوى=لو غرت المكفول ماغرت سليل الدرتين / المكتفل
باكر الى طاح الشراع قناع والظن اللتوى=ضاعت علوم السندباد ورد للصحرا يدور له جمل
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
سقوط
ــــــــــــــــــــــــــــــــــ
ديرها مغنى ترى صاحبك راعي هجوس=شاعرٍ لاضاقت الارض في عينه قصد
طول الليل التغلي وطال بنا الجلوس=ياترى ثملت فناجيلنا ولابعد
سالفتنا عجزت وانحنت ماهي عروس=احملت عشرين مرة ولاجابت ولد
ثوبها يستحضر اللون في كل الطقوس=جاهز للضحك الازرق وجاهز للنكد
كان عندك كذبة ٍ ماتعريها الشموس=خلنا نبني بها في مدى الصحرا بلد
غيرنا يبني مداين على روس الطعوس=وان سألته قال الانسان يخلق في كبد
حلمنا مقتول والقاتل ايمانه غموس=أي حلمٍ نرتجي فزعته واية وعد
كل عام من اوله نشعل الظلما دروس=والغريب ان آخر العام ( لم ينجح .. أحد )
لاتفاءل وجهك المنتظر وجهه عبوس=مثل وجهك ماعلى نظرتك فال السعد
من زمان ونحلتك هايمه بين الغروس=لجت الرمان من شان تجمع لك شهد
مشكلتها حظها يشبه لحظك نحوس=كلما جت عين زهرة لقت فيها رمد
شجرة الحظ ايبست عودها مليان سوس=لاتداوي يامداوي ولاتشكي لاحد
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
مرجحه
ــــــــــــــــــــــــــــــــــ
حولين واكثر وانا واقف بخط الزوال =والريح تاخذ من اغصاني ثمر واجنحه
اشرب هجير القوايل واحلف انه زلال=والشمس تشرب دمي عذبٍ ولاتمدحه
شجرة طريق الثمر والعود منها حلال=بلاش .. واللي بلاش الفوز به مربحة
من مر حافي خذا منها عصاة ونعال=يقطع ويجرح وهي تدراه لاتجرحه
طول ثيابي ومرجحتك عبث وارتحال=في هالقسا ماحلمت بغيمة ٍ مفرحه
ان شفت خيل العواصف قلت هذا ( احتلال )=وان هونت قبل توصل قلت لا .. مذبحه !!
نسيت كيف اشرح الرمضا بعشب الخيال=الواقع اللي تشربته محال اشرحه
نسيتني سكر الجابه ومر السؤال=صوتي " نشز " مكرفونه وانطفى مسرحه
لك نية لاجنوبيه ولاهي شمال=وتقول باب الظنون السود لاتفتحه !!
ظلي كرامه ودليته من اجلك حبال=وكل من تمرجح يقول الشمس لاتلفحه
المرجحه ماتكفيها حدود الظلال=والظل محتار كيف يلاحق المرجحه!
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
غيمه
ــــــــــــــــــــــــــــــــــ
اضحك يصير الحزن عاده قديمه =ماتطري الا مثل مايطري العيد
اضحك تصير اقبح همومي وسيمه=وابخل يدين الوقت فزعات اجاويد
لاتخفت الضحكه تراها حشيمه=في شالها غيمه تلوح لهالبيد
محتاج لي فرحه تعادل هزيمه=محتاج لي خطوه تمرد على القيد
كم لي مقيم وهالمواني مقيمه=والبحر ماينقص ولااظنه يزيد
حلمي وحلمك مثل عقد ويتيمه=مايلتقون الا بشوفه من بعيد
مابيدها تختار للعقد قيمه =ولابيد العقد يختار له جيد
اضحك وخل الحزن يندب هشيمه=ماعمر يابس يرجع اخضر من اجديد
لك ضحكة ٍ مثلك .. ذرابه وشيمه=دايم تجيني في زحام التناهيد
ياما سرينا الليل كاس ونديمه=اجرها من يد وتجرني بيد
نجلس بريح ماتبشر بغيمه=نقطف مواعيد ٍ .. ونغرف مواعيد
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
سيرة العشق
ــــــــــــــــــــــــــــــــــ
ياساحل الملح مل البحر هالسيره=الى متى والمراكب تعشق المينا؟
قديم هالعشق لو لنا غيره=نبي علوم تضحكنا .. تبكينا
ليت المراكب تشوف لعشقها ديره=غير المواني ودمعتنا واغانينا
سمج الحديث الطويل وطالت الحيره=الريح ماهي بيدك ولابيادينا
الى اقبلت حيها والى ادبرت خيره=حنا على ساحل القسوه تربينا
خل الزمن صلب لا ترحم مقاديره=افراحنا مابعدها الا تعازينا
يالساحل" العذب" صار التبر قصديره=انس الطفوله واغانينا واسامينا
صدق التقينا وكان الحب : والغيره=بس افترقنا ولكنا تلاقينا
شاب الزمن في يدينا وانحنى طيره=واسطوره البحر تفنينا وتحيينا
شاب البحر كبر ماشابت اساطيره=مليون عام انتوارث رعبها فينا
والشمس مليون عام تعيد هالسيره=تشرق على " تدمر " وتغرب على " سينا "
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
بروق
ــــــــــــــــــــــــــــــــــ
شمال والليل اشتعل رعد وبروق=وتقول وشبك ماتزيح الستاير ؟
حتى المطر يا" هند " ماعاد له ذوق=طعمه تغير .. مدري اشلون صاير
مابينه وبين اتعس احوالي فروق=مثله مثل طعم السهر والسجاير
كان الظما قلبي.. وبرق المطر شوق=يلوح واصعد له حمام ومناير
واعل واشرب قد مافيني اعروق =والزايد اغسل به ذنوب الكباير
اول وعين الصب حاجاتها فوق=كان ابتهاله " تحت " مجنون .. ثاير
زمان نخلي لاوعد صيف بـ عذوق=تسكن رياح ايلول حتى يناير
زمان ياهند المطر صده " عقوق " =فتنتة غدير يموت فيها عشاير
واليوم في هالجدب مادور حقوق=ارسم ضياعي مستطيل ودواير
في قصر ماله سور .. مدري بصندوق=والثانيه تقراه عيد وبشاير
واسمي مقابلني على الرف مشنوق=جذعه تصلب موت والغصن طاير
بعضي سجين يدي والبعض مسروق=ظلام سجنٍ ما يضويه زاير
ان كان ليل البرق يعني لك شروق=طلي يصير البرق خيل وظفاير
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
شموخ
ــــــــــــــــــــــــــــــــــ
لا الناي صوتك ولا شمس الضيا زولك=لولا شموخك.. تصير بناظري عادي
لا تنحني.. لا تهل وتعشب سهولك=ويربع اللي سكن بالضلع والوادي
خل الخطى تنتحر في درب مجهولك=انا قوي حيل.. واجمل طبعي عنادي
انا اتلذذ بهمٍ يثمر اوصولك=بعض الهموم اشتريه براحة اعيادي
ان ما جوادي يغير.. ويهزم خيولك=سلمته الريح.. ما اعده من اجيادي
وان ما رماحي تصيب وطولها طولك=ابا اترك الغزو واطوي صفة امجادي
واعيش مثل البشر: (عادي على قولك)=الناس ماهم عبيدٍ لي ولا اسيادي
دامك قمر والنجوم تدور من حولك=تأكد انك بعيني: ظاهرٍ/ بادي
دامك بعيد المدى والنور مرسولك=انا على ضو نورك.. مقبل وغادي
وان صرت (عادي) وكلٍ يقدر يطولك=هونت.. ما هو بـ أنا اللي يطرد العادي!
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
لايرحم الله فوج!؟
ــــــــــــــــــــــــــــــــــ
في الذاكرة "ليلى"و"مالك"و"هداج"=وأبيات مجنونٍ جنونه صراحه
جا يشتكي همه لسكان الأبراج=وإلتموا أهل الفلسفه والفصاحه
قالوا عرب .. والقول مايرجع أدراج=يمشي دروبه عوج والا سماحه
لايرحم الله فوج من ذيك الافواج=ولايرحم الله طير يرخي جناحه
راحوا وصاروا سالفة كل هراج=والمقبلين اشد حمق ووقاحه
ياسيدي كيد العدا وارفع التاج=أنا لهم خصمٍ جنوده رماحه
ياسيدي دون النظر رمش وحجاج=تحميه من عج الطريق ورياحه
دون الكرامه من دمي سيف وسياج=والفارس اللي مايخونه سلاحه
باصبر ومثلي لأجمل الصبر محتاج=ماتقبل الدنيا على كف راحه
قررت اغامر واخجل الشمس بسراج=وأخلع عن اللون الرمادي وشاحه
ياسيدي والصدق للقلب منهاج= لو ما يحبك ما أفتداك بجراحه
ما أبيك تلحقني على سيف الأمواج=ماينقذ الغرقان جاهل سباحه
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
ماتشبهك ..أو تشبهك
ــــــــــــــــــــــــــــــــــ
رسمت لك ياعذبة الصوت صوره= ماتشبهك ..أو تشبهك صورة انسان
إنسان غايب واحتواني حضوره=ميزت لونه رغم تعتيم الألوان
في داخلي موجود صافحت نوره= واعجزت الا قي له على الارض عنوان
نذرت عمري رحلة في عصوره=ادوره بين الأماكن والازمان
من غيبته في الوقت حتى ظهوره=ابا انشده في كل روحٍ ووجدان
باهيم واظما في صحاري دهوره= حتى يقابلني وانا حيل عطشان
إنسان في دمي غلاه وجذوره=من جدي وجده ويعرب وقحطان
له في زمان الشك روحٍ غيوره=يزعل على شانٍ ويرضى على شان
ماهو كما خبلٍ تبلد شعوره=عنده خطا الايام والصح سيان
ياعذبة الصوت الزمان وقشوره=خلتني اتحسف على كل ماكان
عمري كتاب:الوقت يمحى سطوره=والمشكله مالي على الوقت سلطان
ينزف قصيدي واغرقتني بحوره=والشعر ما مجدني في كل الاحيان
والساحل المهجور ماتت طيوره=لاعانقت زهره ولاغنت الحان
عيا الربيع الطلق يطلق زهوره =وعيا الخريف يحل مأساة الأغصان
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
بحر الجنون
ــــــــــــــــــــــــــــــــــ
ياغايبه لوغبتي الدهر كله=بيني وبينك يوم لابد ياتي
كني اشوف ارموشك المستظله=تضحك تهنيني بلحن اغنياتي
ياصامته والصمت هذا مذله=الصمت موتي والقصيده حياتي
جيتي وانا اضيّع طريقي وادله=ورحتي وانا متورطٍ في شتاتي
عطشان والصبار محدود ظله=وش لي بظلٍ مايبلل لهاتي
خاويت هالعالم على كل مله=ولالقيت اللي ثباته ثباتي
أول قدوم وجيههم مسفهله=والى أدبرت صارت بلون العباتي
ياغايبه لو لي مع الوقت ذله=عاتبت وجهي لين ترضى جهاتي
كني صدوق وعالم الصدق قله=ياغربتي ضاع الطريق وعصاتي
كني ملول وذكرياتي ممله=وشلون اهاجر من زمن ذكرياتي
عمري شقاوي والفنا غايةٍله=في يوم ميلادي سمعت بوفاتي
بحر الجنون اللي يخيفك مطله =انا على شاطيه كاتب وصاتي
اما غرقت ويضحك البحر كله = والا نجيت وفاخري في نجاتي
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
رفيق الجرح
ــــــــــــــــــــــــــــــــــ
تكفى رفيق الجرح ناولني ادواه = انا انقتلت وخنجري في يميني
يممت شوفي شطر وجه محيّاه=يوحي لي انه خلق من شان عيني
جيت ابزعل ناره ابي جنة ارضاه=ماكنت اشوف الفرق بينه وبيني
اثر النخيل اللي على الدرب تزهاه=تاقف شموخ وكنها تحتريني
هذا انا ياربة الحسن والجاه=بعت الشكوك وراس مالي يقيني
مجنون شعر انسج خيوط المعاناه=من حنطة ايدينك ومن عشب طيني
العمر كله بين حرفي ومعناه=سجنت في بيت القصيده سنيني
هذا انا طفلٍٍ تهاوت به خطاه=مرعوب فلي شالك ودثريني
فنجان حظي كلما جيت ابا اقراه=شفت المصايب تنكتب في جبيني
الحظ يرسم خط عمري ويمحاه=وانا اتعذب والقيود بيديني
هذا انا والقلب هذي عطاياه=ان ما وصلت لغايتك سامحيني
اضحك من اقصى الجرح وابكي من ادناه=متناقضات الخلق مني وفيني
تكفى رفيق الجرح تقتلني الاه=خابت ظنوني والقهر محتويني
ياليت ساقي ظل هالدرب ماجاه=قبل النخيل الباسقة تزدريني
ياليتني ظليت حلمٍت تمناه=ولا حقيقه بعدها ما تبيني
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
لاالعد يخلص ولاحنا ارتوينا
ــــــــــــــــــــــــــــــــــ
حتى أنت ياعاشق التاريخ........ تخشاه= وانت البدر وين ماتضوي .......سرينا
عبدالعزيز ((الظلال))افــــــ بيرقه جاه= اكتب.... و((الإعجاب)) من حقك علينا
اكيد جدّك كتابٍ سهل...نقراه= لكن من الصعب نكتب ماقرينا
من يوم كنا ((صفوف اولى)) ..حفظناه=سيرة....على ذكرها العاطر ربينا
جينا نبي نكتبه ...صرنا نتهجاه= سطور غير السطور اللي تلينا
في كل سطرٍ مدى فعل اكتشفناه= عقب اكتشفنا طموح العود فينا
رحلة طويلة على نهجه ومبداه = شف كم مشينا .. ولا بعد ابتدينا
ابحر شراع القصيد افـــ بحر يمناه= ((مية سنه)) مبحرين ولا رسينا
حارت بنا الريح .. وينه شط مرساه= بعيد.... وفـــ كل مينا يحترينا
شفناه في ((نجد)) وفــ ((دارين)) شفناه= وعشناه فــ اقصى الجنوب وحد ((سينا))
لكن عجزنا ((نسافر)) مع مطاياه=من ظلمة ((الطين ))لآخر ماضوينا
ياطله الدرب ... من خيله و((شلفاه))=حتى بياض المصاحف في يدينا
مشوار ما كانت اكفوفه محناه = تشققت لين قدرت تحتوينا
يابدر قصر بنا ((المعنى)) ومغزاه= قول الف شاعر... وقلي وش غزينا؟!
((عدّ البطولة)) ظمانا ما وصف ماه= ندلي..وندلي.. وكنا ما ادلينا
مية سنة نارده ونرد نظماه= لا العد يخلص ولا حنا ارتوينا
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
حطوه بين الممكن والمستحيل
ــــــــــــــــــــــــــــــــــ
اجذب الشوف حتى وجهك المستباح= وان قدرت اجذب القلب الشقي واطعنه
شفت عندك رماحٍ غير كل الرماح =تطرح الصدر لوكان القمر مزبنه
الصخب والمرايا والوجيه الملاح= ارسمت في عيوني لوحةٍ مخزنه
من تهجيت صوتك خامد العطر فاح = عطرٍ اعشق دياره وافتدي موطنه
سرت كل الرجا والخوف والانشراح=تاه فيك الزمان وضاعت الامكنه
اطلق ايديك لانسام الهوى والرياح= خل جرح السنين يفز من مدفنه
في لياليك هذي تستبد الجراح= ليلة (النيل) لو قلبك خجر تطحنه
من سراها وقف بين الزعل والسماح= تصهر الجرح حتى ينجلي معدنه
كل سرٍ الى سولف له النيل باح= والعصيه تصير مسالمه مذعنه
جيت مثلي من الظلمى تدور صباح= تحسب ان الهموم تشيلها الدندنه
شفني اشد وانزل وين مالبرق لاح= ساعتي ماتراعي دورة الازمنه
من تردّت حظوظه لو ضحك ماستراح=تمدحه في الصباح وفي المسا تلعنه
طال هالدرب ما كل الخطا للفلاح= خطوةٍ تستحيل وخطوةٍ ممكنه
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
ذيك البدايه
ــــــــــــــــــــــــــــــــــ
ماني بمرخص يدي .. واغليك يالماس=ماعمر ذوقي تغير فيك رايه
غلاك من مطلعه مبني على ساس=يفنى العمر والغلا ذيك البدايه
خلك غنى الذكريات وخد الافلاس=يتوسلك .. واحرمه من كل غايه
هزيت حريتي .. والعشق " نخاس "=وجه يبيعه تجافيه المرايه
اسمع حكايات وجهي بين هالناس=الوان لو شفتها .. شفت الهدايه
ضاع الامل ..واعتبرت ان الحلم كاس=يقل .. يكثر .. مصيره للنهايه
بعد الف لايمكن وبعد الف لاباس=كلمه .. لو اقولها تبني بدايه
ماقلتها والغضب مشوب الانفاس=وابليس يقبض تلابيب الجنايه
فاض الردى واعتصمت بكل نوماس=مذكور فـ اهلي وربعي واصدقايه
والا انا طفل كله قلب واحساس=اغرق بدمعه واغرد من حكايه
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
السراج الاعمى
ــــــــــــــــــــــــــــــــــ
لاياصباح الامل لاتلبس الظلما=خذ بارق الليل نور ان خانتك شمسك
أنا قهرت الدجى بسراجي الأعمى=من شان اغني مواويل الهوى بعرسك
صوتك صداه انكسر من رقته وادما=مايوقظ الطفل من حلو الكرى همسك
صح المدينه بدبك خيولك الدهما=واكتب على سورها للذاكره درسك
الذاكره ناكره ماتحفظ الأسما=ان ماجرحت الحدث يومك يصير امسك
قدامك النار والنيشان والمرمى=احرق شمال الأفق واحرص على نفسك
اشتقت للشمس شوق القاحله للما=مليت سود الليال وملها غرسك
جيتك بيدي زهور أقسمت ماتظما=إلا أذا ودعت وجه الأفق شمسك
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
آه ياهذا الطريق
ــــــــــــــــــــــــــــــــــ
ياقلم في سيرة اهل الشعر من قبلي وبعدي=مايسري شاعر فـ ظلما الورق هم ٍ لحاله
ليتني يوم اخترعت القوس جيت بريم نجدي=كنت فوق السرج ماداستني اقدام البطاله
لاسلام .. على الطريق اللي مشيته جهل وحدي=بعد ماعقلوا بني جهلي وكل مسك جاله
رحت ماعرف مبتداه .. ولاآخره وينه يودي=اعرف اني من جنوب التيه واحلامي شماله
مامعي غير الله الواحد .. ومسباح بيدي=مرة اتهيبل عليه ومرتين اسمع هباله
والطريق من اوله عاصي .. وانا غاوي تحدي=من جرح شي ٍ من ظلالي ذبحت اجمل ظلاله
والهبوب بطبعها يوم معي وايام ضدي=والطبيعة مثل " شيخ البر " تنقصها العداله
" الصواع " اللي يكيل فيه ماجا نصف مدي=قلت له ياشيخ ! قال - اعطوه - مكيالٍ بداله
رحت مبسوط بعطايا الشيخ مافـ التيه قدي=جايعٍ دانت له " الحنطه " وصارت في رحاله
يوم ناصفت الطريق الا الخطى فيها تردي =واعرف ان اللي طعامه بر مايشكي الهزاله
قمت اسال التايهين اللي وقف .. واللي يعدي=وآخر المعنى طلع مافـ الرحال الا " نخاله " !!
آه ياهذا الطريق اتعبتني وابديت سدي=مابقى غير القصيد احزمه وانكّس عقاله
يايمين الحبل لاترخين فوق الشد شدي=ماربح في ذا الزمن متساهلٍ يرخي حباله
يالطريق الدلو فـ يديني يبس والعِد عِدي=من عرفته ماورد عذبه شفوق وخاب فاله
جيت لك - مهدي سعيد - ولارجعت سعيد مهدي=هذا انا من شارع الجوعا .. الى خان الظلاله
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
وصلت من التعب حدي
ــــــــــــــــــــــــــــــــــ
لاتندهش من جنوني من عبث يدي=الطفل فيني معيي يافهد يكبر
معكم وكني على شط البحر وحدي=ابني بيوتٍ كبر عمري وهي تصغر
وابني شراع ٍ قليل الحيل مايمدي=مثلي شراع الورق ينوي ولايبحر
يافهد ودي تعود المرحلة ودي=مايكفي اني الى خاويتك اتذكر
عشت بزمان ماهو باخضر ولاوردي=احزانه احزان وافراحه ولاتذكر
ماودي اعلمك لان الشقا يعدي=خلك على حلمك اللي موعدك يثمر
انا تعبت ووصلت من التعب حدي=هذي جراحي على سيف الورق تقطر
عبث بغيت اختلق من جمرتي بردي=وانا ادري ان الغيوم الحمر ماتمطر
في موطن الحلم ضعت وخان بي وعدي=هزايمي تنقص ايامي وهي تكثر
استوطنوا يافهد ناس لفوا بعدي=وانا الى الحين من مهجر الى مهجر
ماني موصيك كيف تكون .. ماعندي=التجربة كلها في الحبر والدفتر
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
ذل المطر
ــــــــــــــــــــــــــــــــــ
قالت تمن .. وقلت ضحكه من القلب=قالت حزين ؟ وقلت ماعرف شعوري؟
قالت يصير الشاعر المرهف العذب=يجهل شعوره؟ قلت ماهو ضروري
فهم المشاعر غلب والبوح به غلب=تكفين خلي لي بقايا غروري
فيني جراح ٍ مزمنه مالها طب=عايشتها تمثيل واتقنت دوري
عودت من حولي على الخاطر الرحب=جبر الخواطر صار معنى حضوري
هذا اعتزى باسمه وهذا " على جنب "=ارسم على كراسها ورد جوري
اغمض الين احلامهم تدخل العشب =واخرج من ابواب السكوت الجهوري
عودتهم .. واعتدت سهلٍ غلب صعب=صار الحلم ضحكه .. تجبّر كسوري!!
من يوم حزني والفرح غاية الحب=اللي توسلته لمنفى سروري
دوني على حدود الفرح رمل ماحب=الا هبوب قوتها من عثوري
امطرت باللي في زمن دين .. من عرب=ذل المطر .. والرمل .. واشكر جذوري
قالت الى هالحد ؟! قلت الوفا : كلب=ضحكة ودارت قلت : ماقلت دوري
كل اربعا موعد على ساحل الذنب=ان طاب وقتك شاركيني فجوري
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
التباس
ــــــــــــــــــــــــــــــــــ
يامترف الكاس صبه عل يروى اليباس=جيتك من ارضٍ مطرها مايبل القصب
ياأجمل الغي زدني كل هالعمر كاس=إن ماشربته على كيفي شربته غصب
كاسٍ على اول سواليفه يحوم النعاس=وكاس ٍ من اول سواليفه يهج التعب
الليله الكاس بعيونك نهر مايقاس=ان ماروى يابس عروقي نذرته حطب
ضيعت الاعوام ادور عن بديل النحاس=والليله اقدر أقول اني مسكت الذهب
مااظن بعدك عرا ولااظن قبلك لباس=انت اول البرد وانت آخر صعود اللهب
باخذ جبينك وطن .. ورموشك السود ناس=أجمل بلادٍ تقيم العدل واجمل شعب
بابدا معك طفل يتعلم وبانسى المراس=علمني اشلون اباتقدم وكيف انسحب
ماتت شعاراتي الأولى ومات الحماس=الى متى اعلم السدرة تساقط رطب
ماللسراب اصل والما عيبه الانعكاس=في النور والحور وجباه الحسب والنسب
ابواب ماتنغلق .. جدران من غير ساس=جنيت وانا استمع للطين واقرا الخشب
وحتى النقوش القديمة في بعضها اقتباس=احتاج ميتين فم لصدقها والكذب
ياأجمل الغي في نهج الحياه " التباس "=عيا يبين معي واحرقت كل الكتب
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
يقين الشك
ــــــــــــــــــــــــــــــــــ
في سؤالي غبا .. لو قلت من تشبهين؟=عيب يطري على بالي وعيب اكتبه
لو يقولون : " يخلق مـ الشبه اربعين "=أقدر اقول : وجهك .. ماخلق له شبه
صعب هذا " البياض " انه يجي مرتين=في وجوه بزيف اللون متقلبه
قبلك الشعر انا وياه : سيف ويدين=ماغلبني .. ولافكرت كيف اغلبه
وبعدك اعلنت شكي .. صار للشعر عين=يعترف في رداة اصله .. وضعف نسبه
قيديني .. وخليني بضعفي حزين=لين يفصح قصيدي واعرف من انجبه
قيدك اول تمرد .. في نضال السجين =لاتفكين قيدي .. يمكن استوعبه
باكتبك في السهر .. والصبح .. والياسمين=في مرار القصيد .. وفـ اعذبه .. واكذبه
بــ اكتب .. وبـ اشطب الطاروق : غث وسمين=بيت ما" حلله " وجهك " حرام " اشطبه
وجهك " استاذ " .. واطفال الشعر حالمين=يدهشون المعلم .. مره وينتبه
في عيونك شباب الحرف .. يرجع جنين=من جديد احلم اربيه .. واهذبه
لازم اغلط واحاول .. واغلط وتعذرين =فضة الشعر حولي .. والبعيد ذهبه
أجمل الشعر .. بيت ٍ كثر ماقلت زين=ارجع انقض يقيني فيه .. واشك به
علميني أشك .. ولاأصل لليقين =لو وصلت ليقيني .. وش بعد أكتبه ؟!!
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
عناد النزف
ــــــــــــــــــــــــــــــــــ
ان كان لك نيه تودعني بـ جرح =تكفى بجرح ٍ مايشافيه غيرك
مابغى الجروح اللي تساوم على الصلح=أبغى " عناد النزف " بعدك يثيرك
قوم رياحك حرض الرمل والملح=تملى العروق المبطيه من غديرك
ماني مبدل فيَّة النخل بالطلح=ان مال ظلك مالي الا هجيرك
قلبي بلادك لاغزو بعد .. لافتح=ماخلق بعد اللي يسهل عسيرك
جمعت منك اضداد ماتقبل الطرح=ماشكي قساك الا لناعم حريرك
وفاك فيما كان مدحٍ على مدح=لو كل شرك مايجي بعض خيرك
لي عام .. لي عامين لاحزن لافرح=مدري وش اللي بين غصني وطيرك
كان الوداع - اجرح - ولاتطلب الصفح=والله عطاك ايلين يصحى ضميرك
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
وافيه
ــــــــــــــــــــــــــــــــــ
مرحبا واحد يناير .. مرحبا والشوق دوبه=يرسم العين بكحيل النون والساهي سماهر
وافيه .. ماراح من هاك الرفيق الا عيوبه=طيبه الزايد وتلويحه لبراق المظاهر
صوتك الشاعر ثواب النور في ظلما العقوبه=لاستكان الظن عن خدر الحرير اقبل مجاهر
بالمعاصي كلها من فزة الشيخ لـ هبوبه=للصباح اللي غفت له سوسنه فـ عيون ساهر
وافيه .. للعذب طعم ولون واغرق في الكذوبه =صرت اجيد الصدق باكثر من لغة , والتيه ماهر
توه اللي كان مايشبه ضحاه الا شبوبه=بالدجى لاقيل واصبحاه .. هذا الليل قاهر
ماعلينا .. كل من خاف العرا يغنيه ثوبه=الهوى مكفول من معطيه .. والمحراب طاهر
ان حكيتي زمزم اطهر مايراق من العذوبه=وان سكتي صوتك اغلى مايصان من الجواهر
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
كل ليله
ــــــــــــــــــــــــــــــــــ
كل ليله
والخيال اللي سواليفه مزون..
يعل سيله
كل ليله والصباح أرباح..
والفلاح لوحه بين (حي على الفلاح)..
و(هيله هيله)
اقصر احلامي طويلة باع..
بين صواع كيال الذره..
وشراع صياد الجمان،
المعذره.. عن ما يشاع.
المعذره خبز التخاطر حدس..
واسف للجياع..
تجريبي الأول قناع..
تجريبي الثاني ضياع بـ هيل هيله
كل ليله والقصار قصار
وتمون الطويله
تسدل السلوى على البلوى ستار
تخفض الحكمه إلى اسفل شاعر..
يمجد شعار
للصعود المنحدر من طير ريشه
مستعار..
وينتمى له
كل ليله تورق أشجار النهار..
ويعشق الوادي نخيله
وكل صبح وهالبراري ملح..
ما صارت خميله
* *
كل ليله والمغني ضد صوته
والسؤال الحي فـ عروفه جواب..
لشكل موته
فـ الدروب اللي تشكك في عصاه..
وفي نباه.. وفي سكوته
فـ الهبوب اللي تسول للعطش
يعلن مماته
يوم ''عيداليم'' تذكير بحياته
''اطلس القيعان'' ترفاه الشقوق..
الساطعه مثل العقوق
القاطعه مثل الشماته
والوفاق المعدني..
يبرق من اقصى قاصيه في موطني..
لادنى 
ه
- مواطني عزه بذاته -
موطني ثامن سما..
والشمس عنده جاريه..
والليل ليله
* *
كل نجم فيه لوام المغني..
وين تهرب؟
كل ما بعد السياج احراج
والملح المهرب
ما يزكي عاشق دمه وريث لدم ''يعرب''
وين تهرب ؟
والسواحل في دمك ''نجد''..
وبيارق مجد..
وانساب وتقرب
وين تهرب ؟
وانت ''للسرحان'' بذراعك وريد
لنخل ''يثرب''
وبشرايينك بيادر قمح
وجنوب وقبيله
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
وحي الأرق
ــــــــــــــــــــــــــــــــــ
متى اكتشفت ان العمر ..
" حفنة ورق "؟!
مدري متى ..
لكني اتذكر تعذيب الشفق
وقبلي قطيع من الهجوس؟؟
وخلفي هزيع من "الأرق "!
**
واتذكر فـ صبح الهزيع..
ان الفصول تبدلت
حتى الربيع..
اقدم جميل فـ دفتري واول
عشق
يبست زهوره في الخيال ..
" إلا السؤال "
امتد فـ كتابي ..
وفـ احبابي ..يفتش عن شمال
المفترق
**
وكان الطريق
يضيق مثل المدرسه
مثل " الزوايا " اللي تحاصرني
فـ ( علبة هندسه )
وصار " الأصيل "..
حكايتي .. ودربي الجميل ..
الى الهديل الي اللي بدمّي
مغرسه
اصحى .. اشيله تهمةٍ بالمسّ
أو بالوسوسة
وانام واصحى اتلمسه ..
لاينسرق
**
وبعد الدروب ؟..
درب لآخر هالعمر
وايام تجمع هالورق ..
في دفتري ..
من يشتري؟!
من يشتري دفتر شعر؟!
ويبيعني " ليلة سلام "..
ابغى انام ..
ابغى انتصر ليلة على ( حرب الكلام )
ابغى انتصر
من يشتري وحي الأرق !
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
مشهد طريف
ــــــــــــــــــــــــــــــــــ
ياعاصف الشعر العنيف
هون فديتك ..
لامهار ولاعسيف
ثلثين من ذيك الخيول
" تبغلت "
والثلث من سرجانها ملت ..
وقيل تحولت
في ملحمة فرسانها مشهد
طريف !
**
اركد.. ترى ماهالدفاتر
واعيه
ولاالقلم ..
عنده ضمير الداعيه
اثنينهم مزمار..
ماوسوس لخصر الراعيه
ولاريح الراعي
من النفخ الكليف
**اثنينهم من ألف ظلمى ونجم
مصباحٍ ردي
يخفي عن عيوني يد الرامي
ويكشف له يدي
كسري فدا ..وذبحي فدي
ليلٍ مخيف
من يوم صار معزبي ...
مايتسع بي خاطر الا ضاق بي ..
حتى القمر
شيح النجوم وعم عشاق
السهر
ضحكه ثلاث من الشهر
وباقي ثلاثينه كدر..
ماله وليف
ياما سفحت لفزعته
قاف " روى "
حتى صعد من وتر مسباحي
خشوع ومستوى
يافارس الظلمى القوي
محتاجك الليله خوي
من هالجهه سبع الحدود ..
ومن هالجهه ذيب ايعوي
وياما ظهرت الصبح من كم
الكفيف
ماشوف من وجه النهار
الا الرصيف
وجروح من دم العرب
وتابوت من يم النهار
والثالث اللي مابتعدت الا اقترب
" هم الرغيف "
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
تجلي
ــــــــــــــــــــــــــــــــــ
يالشراع اللي وقوفك عزم
قل لي
واقفٍ للريح
والا تايب واقف تصلي؟!
واهنيك فيك حيل تقوم ..
حيل تعوم..
حيل تثور ..
في عصر التولي
واهنيك عندك المالح طهور ..
وقلبتك لحظة تجلي
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
بعد وحده
ــــــــــــــــــــــــــــــــــ
بعد وحده
كل غصن س من غصون العطر
يتنفس لوحده
بعد وحده
ينصرف وجه المدينة لاشوارع ..
لـ ابنيه
يستحيل الليل شباكين
والباب امنيه
ممكنه .. واعرف يقيني نرجسي ..
حتى العبق
حتى الارع والغسق
نرجسي حتى الندى ..
حتى اغنيه
كثر ماغنيت .. ماغنيتها
وتظل وحده
بعضها كل العطور ..
وكلها بعض الموده
وحدها اللي مقبله .. والليل فات
وحدها اللي مدبره .. واقول جات
وحدها الاربع
العادلة والمستبده
وحدها والعطر ماعنه خوات
الا اخت وحده
" ليلكه " قبل الثمان..
و " نرجسه " من بعد وحده
«®°·.¸.•°°·.¸¸.•°°·.¸.•°®»ديوان الشاعر مهدي بن سعيد«®°·.¸.•°°·.¸¸.•°°·.¸.•°®»
ــــــــــــــــــــــــــــــــــ
وجه الشبه
ــــــــــــــــــــــــــــــــــ
في شرود المنتبه
فـ انتباه الحالم بوجه الشبه
لو حلم شاعر بموته ..
يعني نص بيكتبه
لو حلم غصن بحياته ..
بعد ماخط الجفاف اسطر مماته ..
يعني فاس بيحطبه
لو حلم اسم بوجوده ..
بين الاسما اللي يدربها
وتقوده ..
يعني جا من يشطبه !!
![[2] سلسلة شعراء جهات: الشاعرة سكون](http://www.jehaat.com/vb/images/ads/jp2.gif)
ديوان الشاعر : مهدي بن سعيد
العرض العادي
